Induve si mettenu i schedari di i mudelli ?

I mudelli predefiniti : squelettes-dist/

I mudelli di a stallazione — vale à dì quelli standard furniti cù a stallazione di SPIP — sò accumpulati tutti in un ùnicu cartulare. Sti schedari cuntenenu l’infurmazioni nant’à a paginatura predefinita di u situ, è ùn devessenu mudificati. Pudete puru sbulicà dentr’à stu cartulare è parte da stu ghjocu di mudelli per adattà l’appaginamentu secondu i vostri bisogni [1].

Sia cum’ella sia, ùn ci vole mai à mudificà i mudelli di a stallazione, chì o sinnò, vi puderiate perde tutte e vostre mudìfiche à ogni aghjurnamentu di SPIP !
Da francà vi di quessa, fate puru una copia di i schedari chè vo vulete mudificà, è spiazzate li puru in un antru cartulare, cum’è indettatu più indà.

U vostru cartulare squelettes/

Dipoi SPIP 1.8, i mudelli persunalizati devessenu assestati in un cartulare di nome squelettes/ (attenti à l’«s» in fine!), chì vi tuccherà à creà lu à a ràdica di u vostru situ SPIP. Sè vo vulete stallà un ghjocu sanu sanu di mudelli (pigliati nant’à SPIP - Contrib o altrò), o puru fà qualchì mudìfica à i mudelli predefiniti, piazzate i vostri mudelli in stu cartulare.

Cusì ne, un utilizatore, vulendu avè u so propriu appaginamentu, svilupperà i so propri schedari article.html, rubrique.html, etc. in u cartulare squelettes/. Pigliate in contu chì ùn hè micca indispensèvule di piazzà un ghjocu cumplettu in stu cartulare.

Da fà cumparisce e pàgine di u situ, SPIP và è cerca i mudelli, prima in u cartulare squelettes/; s’ellu ùn trova manc’unu schedariu .html chì li ghjovi, anderà à circà quellu di a stallazione, in u cartulare squelettes-dist/.
Cusì ne, sè vo avete piazzatu solu un schedariu in u cartulare squelettes, per esempiu article.html, piglierà SPIP stu mudellu per fà cumparisce l’artìculi, è quelli di dist per tutte l’altre pàgine di u situ.

U cartulare squelettes/ riceve tutti i schedari à prò di l’appaginamentu di un situ. Custì seranu dunque assestati :

• i mudelli, vale à dì i schedari .html cù còdice SPIP;
• i schedari inclusi in i mudelli (cù i so schedari php3 currispundenti, per e versioni prima di SPIP 1.9) è i mudelli (dipoi SPIP 1.9);
• i furmulari mudificati, sè pussìbule in un sottucartulare formulaires/
• e foglie di stile CSS chì facenu a vestitura gràfica ; persunalizà le permette di svarià, certe volte di manera sprupusitata, a vestitura d’un situ senza tuccà à i mudelli. Da vede : «Mettez-y votre style !»;
• l’imàgini usitate in i mudelli;
• u schedariu mes_fonctions.php chì cuntene stacci è variàbili di persunalizazione propri à stu ghjocu di mudelli;
• i schedari javascripts;
• i schedari di lingue persunalizati (cf.: «Internationaliser les squelettes», mètudu di i schedari di lingue), sè pussìbule in un sottucartulare lang/;
• etc...

Aduprà un altru cartulare di mudelli

Dipoi SPIP 1.5 hè pussìbule d’assestà i mudelli in un cartulare di nome chì vi pare è piace, basta à dichjarà lu in u schedariu mes_options.php, usendu a variàbile di persunalizazione $dossier_squelettes, cum’è spiecata in a ducumentazione à stu sugettu. SPIP anderà à visticà i mudelli in priurità in u cartulare cusì dichjaratu.

Vi permette quessa, per esempiu, di pruvà un nuvellu ghjocu di mudelli senza inciaccià u vechju, o di gestisce di modu dinàmicu parechji ghjochi di mudelli.

Priurità di i schedari di mudelli

Circheremu à parlà chjaru, è in corte parulle. Più o menu, quandu chì SPIP hà bisognu d’un schedariu, và è u cerca in diversi cartulari, secondu st’òrdine quì:

1. prima, in a lista di i cartulari indettati da a variàbile $dossier_squelettes, s’ella hè definita questa ;
2. dopu in u cartulare squelettes/, à a ràdica di u situ;
3. poi (dipoi SPIP 1.9) in a lista di cartulari di a variàbile $plugins;
4. poi à a ràdica di u situ;
5. poi in u cartulare squelettes-dist/;
6. è infine in u cartulare ecrire/.

«Più o menu» sì..., chì custì affaccanu duie o trè cusarelle [2], frà altre cose un òrdine di priurità per ogni schedariu mudellu, chì permette di fà variazioni più fini : per rùbbrica, per rambellu o per lingua, cum’è spiecata in a ducumentazione apposta.

Rimarca: Dipoi SPIP 1.9 : In fatti, a mecànica discritta più sopra per sceglie u postu d’un schedariu ùn hè micca solu appiecata à i mudelli, ma dinò à tuttu u còdice di SPIP. Per parlà u ghjergu di i sviluppori, si tratta di «soprascrive u còdice», l’òrdine di i cartulari essendu in u «SPIP_PATH». Definisce quessa u quatru è e règule per u sviluppu di i «plug-ins», funziunalità stese di SPIP chì tuttu ognunu pò arricà à prò di a cumunità.

Cusì ne, pò omu mudificà quant’ella li pare qualsìasi caratterìstica di cumpurtamentu di SPIP, senza privà si di e future evuluzioni di a stallazione nè di i cumplementi di a cumunità. Eccu chì SPIP hè fattu «à mòduli»!

Appena di storia: Chì SPIP vachi à ricircà mudelli à a ràdica di u situ hè fattu stòricu, perchè era u locu induve eranu impustati à l’iniziu. Permettia ch’elli si pudessinu «vede» i mudelli cù un navigatore, postu chì e lee versu i .css è altre vestiture eranu per forza scritte «in duru», da a ràdica.
Inoltre, finament’à SPIP 1.8.3, SPIP circava i mudelli à a ràdica prima d’andà à circà li in u cartulare squelettes/.

È quelli schedari .php3 (o .php) allora?

Prima di tuttu ramintemu chì dipoi SPIP 1.9, ùn ci hè più schedari .php3 (o .php) per i mudelli: SPIP calculeghja tutte ste pàgine à parte si d’un ùnicu script spip.php. Tuttu ciò chì seguita hè dunque fattu stòricu.

In SPIP 1.8.2 è SPIP 1.8.3, esistia un schedariu page.php3, versione antivista di u futuru spip.php è di u modu d’inclusione di SPIP 1.9. Difatti, permettia page.php3, solu solu, di chjamà qualsìasi mudellu passendu per paràmetru a variàbile di fondu, vale à dì u schedariu mudellu .html da aduprà:

www.umositu.org/page.php3?fond=u_mo_mudellu&...

U più sèmplice tandu era di fà e chjame di stu modu [3] per tutti i mudelli fora di quelli assuciati à l’ugetti principali (artìculu, dispacciu, rùbbrica, sunta,...), postu chì per questi esistia un schedariu .php3 à a ràdica, permettendu cusì a chjama nurmale, à l’usu:

www.umositu.org/article.php3?...

Finament’à SPIP 1.8, bisugnava à creà un schedariu .php3, chì currisponde à u vostru .html in l’anziana struttura di i mudelli SPIP, chì per forza duvia esse postu à a ràdica di u situ [4].