Di règula, omu principia un novu situ «lucalmente» o in un spaziu di gràtisi ma cunfinatu, poi mumentu datu, nasce u bisognu di tramutà lu versu un altru òspite. O puru, da persona primurosa chì ùn li piacenu tantu e gattive surprese, omu si vole tene abbastanza à spessu qualchì copia di salvezza di un situ.
Fintantu chì u situ seguita certe règule, firmendu si in u quatru di SPIP [1] vene fàciule di ricuarà un situ SPIP. Quessa si face di listessu modu è senza di più cunniscenza tècnica chè per stallà lu.
Prima di lampà si
À dì la franca, vi serà fàciule di ricuarà da un situ :
- tuttu a robba ch’omu hà inseritu usendu l’interfaccia privata di SPIP, creendu rùbbriche, artìculi, dispacci, siti sindicati, è ancu imàgini è ducumenti alleati.
- a robba persunalizata SPIP da a custruzzione di mudelli, è ancu i vostri affarucci scritti in PHP.
Ma puderebbe esse più cumplicata in casu chì :
- u situ abbia estensioni o adopri mudelli fora di SPIP, per esempiu PHP. In particulare, bisogna à sapè s’elle usanu st’estensioni d’altre tàvule o base di dati, è sì/duve/cumu omu e deve cunfigurà da adattà le à u nuvellu òspite.
- omu abbia mudificatu u nòcciulu di SPIP da per sè o cù un’estensione, per esempiu e minichichje e più scimattulite di SPIP-contrib
Prima di principià ci vulerà à assicurà si dinò di a presenza di e seguenti dati :
- un contu amministratore di u situ SPIP,
- un cliente FTP configuratu o da cunfigurà,
- i còdici d’accessu FTP à l’anzianu òspite è à u nuvellu (URL, login è password, per ognunu)
- i còdici d’accessu à a basa di dati di l’anzianu òspite è u nuvellu (URL o localhost; login è pasword per ognunu)
Priparà u situ
Avvisate !
S’ellu hà u vostru situ un’attività impurtante, megliu serebbe ch’elli ùn ghjunghjessinu cuntributi novi mentre u tramutu di u situ. SPIP ùn hè pruvistu di nisunu mecanìsimu apposta per quessa, ma omu pò digià (è, megliu serebbe, qualchì ghjornu prima l’uperazioni) :
- avvisà l’autori cù mail, sì omu ne hà una lista,
- pustà un avisu generale in a mesageria interna di SPIP,
- in casu mai, pubblicà l’avisu propriu nant’à u situ.
Tramutatu ch’ellu serà u situ, serà sempre pussìbule di verificà in l’almanaccu di u situ è in a veghja di i fori di l’anzianu situ, s’elli sò ghjunti novi cuntributi, è tandu rifà a spurtazione è l’impurtazione, ma sta volta, solu di i dati versu un situ digià priparatu. Invece sì in u frattempu ci sò ghjunti cuntributi in u novu situ, site cottu ! vi tuccherà à sceglie cumu assestà i dati [2].
Ùn tratteremu quì di e cunsiderazioni pè raportu à l’URL di u situ, in particulare per sapè sì omu a scambia, o sì omu hà un DNS in propriu chì a rinvia. In u primu casu, bisugnerà à circà à avisà l’utilizatori d’una manera o di l’altra. U megliu hè d’almanaccà un tempu di vita inseme di e duie URLs è di mette in a prima una pàgina di «lavori in corsu» mentre u tramutu, poi una pàgina di rinviu versu u nuvellu situ, tempu ch’ellu hè prontu quessu. In u secondu casu, sì omu vole cunservà u nome di duminiu, bisugnerà à fà mudìfiche in u DNS, ma cù assai cura, sopratuttu perchè esiste un tempu di sparghjera di i dati, chì pò ghjunghje fin’à 48 ore è più ... [3].
Sviutà u cache prima di fà una copia di salvezza di a basa di dati. Hè spiegata sta prucedura in l’artìculu : «Sauvegarder vos données».
Duie manere di creà u nuvellu situ
Si ponu distingue duie manere di fà u tramutu d’un situ :
- a prima serebbe di scaricà versu u vostru urdinatore tutti i schedari di l’anzianu òspite, à trasferisce li versu u novu, poi à compie a cunfigurazione SPIP,
- a seconda serebbe di ricuarà solu i dati è a robba persunalizata di u situ SPIP, stallà SPIP nant’à l’òspite nuvellu è trasferisce i dati è a robba persunalizata.
À vista à ochju, a prima serebbe a più sèmplice, ma scaricà l’archivi sani sani di SPIP ùn ghjova à nunda è puderebbe ancu durà troppu tempu. A seconda hè più distinta, è pò esse ancu l’occasione pè u webmaestru di fà appena di pulizia in u còdice d’un situ, tenendu si solu ciò chì ghjè ùtule.
Pussibulità 1: scaricà tutti i schedari
- Usendu u cliente FTP, scaricate versu u vostru urdinatore tutti i cartulari è schedari chì stanu à a ràdica di u situ, tenendu vi a struttura di i cartulari,
- in a copia lucale di u vostru urdinatore, sguassate puru u schedariu inc_connect.php3, chì stà in u cartulare ecrire/,
- scaricate tuttu cù FTP versu l’òspite novu,
- usendu un navigatore, visitate u cartulare ecrire/ di u vostru nuvellu spaziu uspitatu è cumpiite l’ùltima tappa di stallazione di SPIP. À stu puntu seranu necessari i còdici di cunnessione à a basa di dati di l’òspite novu, è forse dinò vi tuccherà à scunfinisce l’affri di diritti d’accessu à i cartulari di SPIP.
- Andate in u spaziu privatu cù u contu amministratore chè vo avete creatu ghjustu nanzu, è intrite in «Cunfigurazione di u situ», «Mantenimentu di u situ», poi lanciate : «Risturà a basa», è basta cusì.
Cunvene quì à tene à mente chì quellu contu amministratore creatu quandu omu cunfigureghja SPIP vene persu tempu chì a basa cumpletta vene impurtata. Da quì bisogna à aduprà i conti di scrittori cum’elli esistianu in u situ iniziale.
- vi firmerà solu à verificà è turnà à cunfigurà dui o trè affarucci nant’à u situ, cum’è :
- adattate u ghjocu di caràtteri, sè vo avete mudificatu a cunfigurazione predefinita di SPIP è s’elli vi venenu affari strani in u vostru spaziu pùbblicu,
- definite u (nuvellu) indirizzu URL di u situ, u nome di u situ è l’indirizzu di u webmaestru, in a cunfigurazione di u situ,
- verificate altri paràmetri, cum’è l’interattività o e lingue.
Pussibulità 2: ricuarà solu i dati è a robba persunalizata
Prima di tuttu bisugnerà à buscà si cù precisione u nùmeru di versione di SPIP [4] stallatu in u situ ch’omu vole tramutà.
- Stallate in u vostru spaziu uspitatu a listessa listessa versione SPIP, cusì discritta in «article 4362».
- Principiemu cù i dati. Da u vechju spaziu uspitatu bisogna à ricuarà :
- u schedariu
ecrire/data/dump.xml.gzdi salvezza di a basa creata à principiu, - u cuntenutu sanu sanu di u cartulare
IMG/, cù l’imàgini è i ducumenti alleati di u situ.
- scaricate li torna versu u nuvellu spaziu uspitatu, mettendu li in i listessi cartulari.
- Andate in u spaziu privatu cù u contu amministratore chì stallendu SPIP omu hà creatu ghjustu nanzu, è intrite in «Cunfigurazione di u situ», «Mantenimentu di u situ», poi lanciate : «Risturà a basa».
Da stu mumentu in poi, pudete vede u cuntenutu di u vostru situ cù i mudelli di a distribuzione di SPIP. Ùn ferma più chè à ricuarà a robba persunalizata di u situ SPIP, cupiendu da l’anzianu òspite versu u nuvellu :
- i stacci persunali è opzioni : vale à dì i schedari mes_fonctions.php3 è ecrire/mes_options.php3
- i mudelli : cum’è quì spiegata, secondu a versione di SPIP, o stanu in u cartulare squelettes, o stanu in u cartulare ch’hà u so nome definitu in mes_fonctions.php3 da a variàbile $dossier_squelettes, o stanu propriu à a ràdica di u situ. Sia cum’ella sia, bisogna à ùn scurdà si micca di i schedari squelette.php3 chjamati direttamente, è chì stanu à a ràdica di u situ.
Bisugnerà dinò à fà listessu regulame in u spaziu privatu chè quandu si tramuta u situ cupiendu tutti i schedari.
Eccu. Sì u vostru situ ùn hà estensioni o mòduli di sù le forche, basta cusì ! Ricaricate puru e vostre pàgine è, nurmalamente, duvite vede u vostru situ tramutatu.